＊食肉瘦的最愛＊Running燒

今日幾個同事一齊外出工作，經過彌敦道阿頭話佢萬歲，食埋飯先再返公司。行左一陣，阿頭話想食韓燒，試過9樓間Running燒唔錯，但經常爆滿，一於上去睇睇，希望有位啦。


可能時間尚早，加上平日，所以唔洗等都有位，真係好彩呀。睇下價錢牌，價錢都好相宜。

 餐廳裝修好有風味，好似韓劇比較鄉郊老店既感覺，配上播放中既k pop音樂，一個字，韓！

點菜紙有多款選擇，豬牛雞羊、海鮮蔬菜、甜品小食，應有盡有。飲品係自助形式，自己出去任揀任飲。


大家都好肚餓，一坐低就點左幾款熟食，之後再慢慢燒肉燒海鮮。

韓式炸雞即炸熱辣辣，炸粉唔會過厚，外層脆卜卜，裏面雞肉仍然幼嫩，仲有雞汁濺出，好味道！

同事試左噴火炸雞中辣，真係辣到噴火，嗜辣既朋友必試。

韓式炒粉絲，粉絲彈牙爽口，味道剛剛好，有韓國街邊檔風味。

生蠔大大隻，肥美飽滿，燒熟後都唔縮水，一啖咬落去仲爆汁，非常鮮味。

扇貝好巨型，原隻燒熟後連埋殼既湯汁一齊食，又鮮又甜。

蔬菜菇菌類全部都洗得好乾淨，燒到微焦既五花腩，用生菜包住，再加埋泡菜，好美味呀，連續食左四五件都唔覺膩。

牛魔王同事食址晒咁多款牛肉，本身想問下佢有咩評語，但見佢食完一件又一件，叫完一round又一round，唔洗問都知道答案啦。