＊燒肉拼盤超高質＊浦井韓食居酒屋

同朋友去isquare玩咗陣手機，夜晚見有啲肚餓就落咗去7樓呢間舖正食嘢，原來呢層有好多日式韓燒等等嘅食物，見呢間價錢唔錯，而且賣相吸引，就入左去試下啦。隔離都有一間係燒肉嘅，但係呢間主要係定食，而唔係任食， 對於唔算太肚餓嘅我哋嚟講係無負擔！

我哋兩個人一場黎到一定要食燒肉啦，首先嗌咗一個拼盤。店員話一個拼盤岩岩好係兩個人嘅份量，上牛烤$288(小牛牌，肉眼，牛肩胛脊，腹胸肉，牛舌)  

每款肉嘅質地都非常之juicy，有幾款牛係經過醃製，有啲就冇，反而嗰啲比較重牛味，即係唔使點上佢秘製嘅辣醬都已經好好食，食得好滋味。 咁嘅價錢嚟講有咁大分，實在係非常之抵食！！！

八道水冷麵＄75 麵的質地並唔係想像中咁爽口，而係林身，有啲似日式拉麵，味道淡淡的。配上牛展就最佳喇，隔離有啲爽口質地軟身嘅牛展，牛味非常之重。

還點了甜品，女生總有第二個胃，這就是可可控(窩夫，雪糕，可可米，果仁碎) ＄68，口感非常之豐富，特別係嗰啲可可米非常之香脆，食完仲有d痴牙添。而雪糕亦都唔普通，質地非常之香滑，帶有淡淡嘅雲呢拿香味，有兩球，一人一球。

喺眾多嘅韓式居酒窩入面，佢呢間算係提供好多酒水，但由於唔係幾掂酒精嘅關係，我哋大家都嗌咗沙冰。

芒果沙冰$38和菠蘿沙冰＄38。大家味道都唔錯。而我嗰杯菠蘿沙冰有啲菠蘿蓉，好味之餘仲好有口感，正正子！