今次三五知己去旺角搵一間Cafe諗住傾吓計食下野，
喺旺角百老匯戲院附近有一間上樓Cafe，
叫做「Nardo's Cafe」，我哋三個人就上咗去試吓。
上到去見到Cafe門面，再沿住彎彎嘅路行入去Cafe入面，
行入去之際，見到右手邊櫥窗入面，
有好多特別嘅裝飾擺設，以及木偶士兵，好新奇。
另外Cafe入面提供好多唔同嘅益智遊戲，卡Game等等，
可以一班朋友一邊食一邊玩下啲鬥志鬥力嘅遊戲。
另外餐廳以紅白色為主，仲有我最鍾意嘅水晶燈，
感覺好華麗，有氣派，另有一番格調。
見到餐牌上面有散叫食物、晚市套餐同埋二人套餐，
由於我哋三個人嚟食，想試吓唔同嘅嘢食，所以我哋散叫食物。
先叫咗啲小食，唔少得我哋最鍾意食嘅雞翼啦，有三隻味道嘅雞翼選擇，
我哋就選擇左雙拼雞翼，就係「蒜香雞翼配蜜糖雞翼」，每款雞翼有四隻。
雞翼賣相非常吸引，而且炸得非常香口，肉質鮮嫩，新鮮即炸，正！
另外叫咗「吉列黃金蟹鉗」，蟹鉗炸到金黃色，
咬落去非常香脆而且熱辣辣，蟹鉗中間用麵粉做成，但食落去比較粉狀。
最後叫咗個「芝士薯條」，芝士薯條好大碟，
足夠我哋三個人食，而且面頭非常多芝士，
芝士溶晒落啲薯條，食落去仲係好脆，
脆脆地加埋少少芝士醬好夾，唔使點茄汁都好好食。
之後叫咗兩個晚市套餐，
分別係B餐嘅「卡邦尼煙肉意粉」同埋「香蒜忌廉蜆肉煙三文魚意粉」，
加＄10仲有「鮮雜菜沙律配日式蛋醬」，同埋加＄10仲可以要埋「忌廉蘑菇湯」，
有得比客人自由選擇。
我哋先食咗沙律，見到沙律有唔同款式嘅蔬菜，
而且食落去好新鮮，蔬菜同埋番茄仔好甜，幾醒胃。
另外個忌廉蘑菇湯好足料，湯嘅面頭仲有香草，
忌廉味好重，而且入面有好多蘑菇，飲落去好creamy，幾好飲。
「卡邦尼意粉」賣相非常吸引，見到有好多煙肉片，
另外仲有好多配料，有洋蔥同埋三色椒等，
而且意粉非常入味，啖啖都係忌廉蛋汁味道，正。
而「香蒜蜆肉煙三文魚意粉」賣相一樣唔差，
驟眼睇都見到好多蜆肉同埋三文魚粒，
最特別係佢上面紅色一條條嘅脆卜卜條，
食落去每一啖都有脆口嘅感覺，好特別。
最後叫咗杯「曲奇沙冰」飲，估唔到咁大杯，
而且賣相非常吸引，有一塊Oreo餅乾係沙冰上面，
飲落去非常濃郁嘅曲奇味道，真材實料，正！
食咗咁多野，都係唔使＄500埋單，價錢合理超值，食到好飽，好滿足。
沒有留言:
張貼留言