今次去到位於旺角鬧市嘅一間上樓Cafe，
叫做「To-Gather Cafe」，入面環境裝修簡約，
位置寬敞，有四大張卡位，適合一大班朋友或者幾個人晚餐用。
除咗可以用餐之外，仲有好多益智遊戲，
例如啤牌、UNO同埋棋類等等嘅遊戲選擇，多種款式。
餐牌上有唔同嘅套餐，有啲係一大班人嘅套餐，
另外都有啲一人套餐選擇，我哋就揀咗二人套餐「Party A」再配多一樣小食。
套餐包含咗唔同嘅食物， 首先就係沙律「田園沙律配日式芝麻醬」，
賣相好吸引，七彩顏色，而且好大碟，入面有洋蔥、粟米粒、
番茄仔同埋青瓜片等等，再配埋咁惹味嘅芝麻醬，味道好match，開胃之選。
之後就係食套餐入面嘅小食，小食有五款，
包括「美式脆薯角」、「健康素春卷」、「秘製日式餃子」、「招牌鹽酥雞」同埋「惹味咖喱角」。
首先嚟咗「秘製日式餃子」，賣相好吸引，見到餃子上面鋪滿燒汁、
一條條嘅沙律醬同埋紫菜，咬落去熱辣辣，皮薄餡靚，肉質鮮嫩，好食！
由於我哋額外叫咗一客「蒜香雞翼」，所以雞翼就連埋其他四款小食一齊上，
變咗有好大盆小食拼盤，賣相非常吸引，我最鍾意食佢嘅「脆薯角」同埋「蒜香雞翼」，
薯角炸到好香脆可口，再點埋茄汁非常滋味。
另外，蒜香雞翼炸到塊皮脆卜卜，仲有啲蒜粒係上面，正！
主菜三選一，我哋就選擇左「香草白汁雞皇飯」，雞皇飯又係好大碟，
飯上面鋪滿白汁同埋雞粒，仲有粟米粒同埋蘿蔔絲，好多配料。
食落去啖啖都係雞粒，仲有白汁配埋啲飯，同肯德基嘅雞皇飯有得揮。
另外特色飲品可以任飲，而且仲有六款選擇，
我哋就叫咗「青蘋果菠蘿」同埋「柑桔檸檬」。
「青蘋果菠蘿」綠色，飲落去真係有好濃嘅青蘋果菠蘿味道，
而且唔太甜，解渴之選。另外「柑桔檸檬」好清甜，我至愛。
最後套餐入面可以以優惠價＄10配蛋糕一件，
分別有「紐約芝士蛋糕」同埋「咖啡朱古力慕絲蛋糕」兩款選擇，
我哋就叫左一件「咖啡朱古力慕絲蛋糕」，賣相好吸引，
蛋糕分咗幾層顏色，層次好分明。首先蛋糕上面有啲朱古力絲，
白色嗰層係cream，第三層淺啡色係咖啡慕絲，
最下面果層就係朱古力蛋糕，食落去滿口都係咖啡朱古力味道，
而且比我想像中好食，必食！！
食咗咁多野都係三百幾蚊埋單，又有得玩遊戲，又坐得舒服，飲品又任飲，真係超值！
沒有留言:
張貼留言