尋日去咗新開嘅Midtown 29樓 101Grill Bar+Hot Pot食晚餐，
個景觀超級靚，其實基本上成幢野都係食環境再加食物質素。
一開始我哋幾個就揀咗一個鍋底先，最近好似好興「卜卜蜆」，
一於就食個「台灣香辣三杯卜卜蜆涮涮鍋」，裏面嘅蜆分量十足，
加上有我最愛嘅金菇，番茄，豆粕和雜菜。
湯底味道都幾濃郁，有台式風味，蜆肉就比較細粒不過勝在份量夠多冇沙。
微辣不過會越食越辣！
差啲唔記得咗講前菜有手工麻辣麻醬手撕雞微辣+秘製麻辣木耳，
兩樣都係辣辣地，幾開胃，
不過手撕雞我就覺得比較大件啊，如果細細舊會更加入味好味！
木耳就非常爽口又省位，建議可以encore幾次。
特色嘅火鍋拼盤就可以二選一，就算係兩個人都可以選擇兩個唔同嘅拼盤
我哋比較鍾意食滷水所以都揀咗滷水果一邊，
唔好以為滷水就唔使整熟佢，都要整多次。
滷水豬耳、滷水蛋、滷水腎片、滷水大腸、滷水牛肚、鹽水雞翼全部都幾入味架！
睇到顏色就知道啦。特別係豬耳夠晒爽口，腎片真心幾唔錯，其他都夠乾淨。
鹽水雞翼咸香十足。
以為淨係甜品店先食到嘅嘢一樣可以打邊爐，
台灣九份紫薯芋圓、台灣九份地瓜芋圓兩樣都係甜甜地，
雖然湯底係鹹嘅但係食落都係比較甜，
另外最得意嘅就係紫薯水晶包，一開始未熟嘅時候就係白色好似湯圓，
熟咗之後就會變咗好似水晶有一條條紫色嘅紋，
就算唔叫滷水套餐，喺追加餐牌裏面一樣有得叫。
同行朋友唔係太鍾意食牛，咁就選擇豬肉啦。
西班牙伊比利亞黑毛豬肉片老實講啲花紋都做得幾好，
唔會太肥，而且真係食到黑毛豬嗰個香味，
同普通豬有啲唔同，因為湯底味道夠香濃唔需要配上任何醬汁。
手工即炸響鈴卷配手工即炸魚皮大件到不得了，你話唔係自己整都唔信。
飲品都係好重要嘅－ ，因為如果鍾意飲酒嘅人就一定要來啦，
無論係雞尾酒、紅酒或者白酒都係任飲，不過如果要揸車嘅話就量力而為啦！
唔鍾意飲酒一樣有大把台灣飲品選擇，
包括左珍珠系列，沙冰或者水果茶等等⋯
我哋選擇嘅珍珠系列大大杯味道唔錯，
除咗有珍珠之外仲有一啲忌廉，飲飲下其實都幾飽。
人均消費大概＄400左右，但係已經可以睇到維港嘅景觀同埋出面仲有露台可以比啲人食煙或者企喺度欣賞下風景都係一個幾relax嘅體驗。
