＊午餐泰識食＊泰聚

​

平時返工食lunch都唔知去邊度食好，見到公司附近有一間以黑色為主裝修的泰國菜，

叫做「泰聚」，感覺上好華麗Feel嘅裝修， 充滿着泰式風味，

而且餐廳門口出面有錶位泊車，非常方便，所以選擇咗嚟呢度食lunch。

 

餐廳環境整潔，位置非常寬，以落地玻璃設計，陽光能夠射入餐廳，好舒服嘅感覺。

 

 

 

 

 

 

 

 

 

 

見到餐牌上有唔同款式嘅lunch套餐，

包括「泰式粉麵」、「普通午市套餐」同埋「有營行政小菜套餐」，

而飲品方面有不同飲選擇，例如「原隻菠蘿沙冰」同埋「原個西瓜沙冰」等等，

仲有我最鍾意嘅泰式甜品，多款選擇。

 

 

 

 

 

 

 

 

 

 

 

我哋就叫左一個「有營行政小菜套餐」，就係「泰式海南雞配雞油飯」，

呢個套餐仲配埋一碟油菜、一碗泰式例湯同埋飲品，

而我就比較鍾意飲沙冰系列嘅飲品，所以就加左＄18要一個「原個西瓜沙冰」。

 

食物終於嚟到喇，套餐用一個盆裝住上菜，

首先就飲泰式例湯，原來係冬瓜湯，湯嘅味道好濃郁，

有好濃嘅冬瓜湯味道，而且唔太鹹，味道剛剛好，

仲係熱辣辣添，湯入面有一舊冬瓜，冬瓜煲到好「林」，

食落去軟林林又爽口，好飲。

 

泰式海南雞有雞髀嘅位置，另外仲有少少雞胸，

再配埋一碟泰式辣汁一齊食，好惹味啊，

泰式辣汁唔算太辣，而且雞嘅肉質滑，

有雞嘅味道，再配埋油飯一齊食，好正，必食之選。

 

另外西瓜沙冰賣相非常吸引，佢真係用成個西瓜裝住啲沙冰做成架，

而且啲西瓜沙冰係用新鮮嘅西瓜汁造成，賣相咁吸引，

飲落去都非常好飲，份量非常多，食完飯仲喺度飲緊添。

 

而我個朋友就叫左「午市套餐」嘅「泰聚滷水豬髀飯」，

又係配埋一碗泰式例湯，泰式例湯一樣都係冬瓜湯，

而豬髀飯配左一碟黃色嘅泰式辣汁，豬脾賣相非常吸引，

見到佢啲豬脾皮非常滑，而且滷得好入味，肉質好「林」，

食落口有入口即溶嘅感覺，再配埋黃色辣汁一齊食好match啊。

 

 

 

而餐飲方面我朋友就叫咗「原個菠蘿沙冰」，

菠蘿沙冰一樣都係用原個菠蘿裝住，

菠蘿沙冰當然飲落去都係菠蘿汁嘅味道，

而且份量都好多，佢爭啲飲唔晒添。

 

最後我哋叫咗個「泰式甜品」來試吓，

當然有我最鍾意嘅椰汁糕啦，味道一樣好正，

而且唔算太甜，我哋一口氣就食晒四件了。

 

 

 

 

 

 

 

 

 

 

 

 

 

 

 

 

最後埋單都係＄200多啲，

兩個人就可以食到咁豐富嘅午餐，

而且好味，真係非常抵，下次再介紹其他同事嚟食下先。