＊地表最強雞煲＊18樓雞煲

​

之前係Facebook見到個地表最強雞煲，見到都流晒口水。最重要係價錢合理，百幾蚊＋10%

 , $200都唔使就可以享用到雞煲同埋火鍋嘅放題（不過係冇刺身嘅）。

好彩訂定位，去到人山人海，如果walk in真係唔敢擔保。

好快就已經可以入咗去，立即點個雞煲食先！

原來雞煲嘅雞會按人嘅份量去比，不過我都唔敢食太飽，留返個肚食火鍋。

 

 

我就唔係太食得辣，所以都係叫咗走辣安全啲，費事到時「爆谷」😂

雞煲上面有好多香料，包括左芫荽同埋蔥花等等嘅配料，

調味非常適合港人口味，香港人就最鍾意食得甜甜地，

所以啲雞嘅秘製醬汁都係有啲甜架。

以為啲雞會好頹廢，點知原來都幾滑。

Facebook讚好就有一杯大大杯嘅凍檸茶，仲要免費任加⋯見到個杯已經覺得會飲唔晒！

當然檸檬就冇得任加la。

之後加左普通嘅豬骨湯底就開始食火鍋，牛肉脂肪分布都OK ,有得任食仲想點！

出去兜咗一個圈，飲品櫃有好多個有唔同Drinks係可以自取；

仲有蔬菜籃喺點菜紙上面係冇嘅，要自己出去拎。

是日海鮮蜆肉，細細粒，食咗都唔會太飽，不過吸左湯底嘅香味都唔錯，又冇沙。

羊肉soso地，如果會食羊肉嘅話都可以叫來試吓，分量唔會太多，唔使擔心食唔晒。

豬肉都可以食，好肥美質素唔錯。

金菇、水魷、牛柏葉質素都好好，金菇比較粗身所以食起嚟都比較爽口；水魷就算放得耐左都依然好彈牙，必食之選。牛柏葉就真係夠晒爽口好味一定要食！

食多咗肉都開始飽飽地，今次唯有唔食菜冇咁健康，下次一定要留肚食菜。

出面仲有冇甜品機可以食甜品，朱古力味嘅雪糕小清新，總共有三款口味可供選擇。