之前去唱K食午餐，學生價就平啲，
呢幾個月做緊優惠如果係學生嘅話成績又好或者學生證上面有幾個數字又有特價。
牛肉烏冬個味精都幾勁，一飲就知道佢好重手，
落咗好重手味精，牛肉都算OK不過有少少雪藏味，
烏冬就普普通通啦，一包包嗰啲包裝烏冬。
吉列豬扒咖喱飯我朋友就鍾意食呢啲熱氣野，
不過個吉列皮同埋個豬扒都分得幾開，
肯定係攞貨嘅時候已經有埋皮，炸得唔夠香，啲飯都算軟熟。
2016年11月25日 星期五
＊生日之西餐評＊Penthouse
小妹的生日真係多謝大家捧場，請我食一餐高貴嘅晚餐，
平時同朋友出街食飯都會食啲平平哋，始終我哋呢啲年紀真係冇乜錢，
如果人哋請食飯又唔同講法，當然要寫返一篇食評做記錄。
佢哋帶咗我來呢間30樓嘅西餐廳，喺地鐵站行過嚟大約5分鐘內，
景觀開揚見到對面高樓大廈嘅頂部，啲光閃下閃下都幾有趣，
聽講係2015年同埋2016年嘅米之蓮都有入圍，
人哋話入得去嗰啲餐廳都唔錯，唔怪得座無虛席啦⋯
走先有位...~
諗食乜嘢真係好傷腦筋，為咗解決大家嘅選擇困難症，都係揀套餐方便啲喎！
普通套餐已經有好多唔同嘅食品，索價$1288，如果好味嘅話價錢都抵番，值回票價。
咩嘢食都未來之前會上咗一款麵包，外脆內軟，比較乾硬，點埋綠色醬汁好清新。
24Aged巴馬火腿我成日都分唔清到底係隻豬出咗世24個月定係醃制咗24個月⋯
不過見到呢個英文應該係2年生命豬。
人哋話巴馬火腿一定要加哈密瓜先好食，本身巴馬火腿鹹鹹地不過唔會咸親條脷，
好有風乾嘅香氣，配埋甜嘅哈密瓜中和左味道更添清新。
果然無揀錯，唔係我揀架haha！
湯就Set咗冇得揀，一定係呢個忌廉松露蘑菇湯，表面有啲炸過嘅餅碎鹹鹹地，
叫做增加左口感，本身個湯都幾杰，飲飲吓有一大堆松露，
所以最好首先攪拌再飲用。松露同蘑菇本身已經好夾，
個味道都好似，一口一口就飲完，唔會覺得油膩。
其中一個主菜加左＄128 轉左龍蝦意大利飯，
嗰碟好大啲飯都好多，最犀利係每一粒飯都有好香嘅龍蝦味，
仲有少少龍蝦殻，口感唔係正宗的硬但亦唔係林。
中間嘅龍蝦已經起咗肉，可以直接食好爽口，
鮮味十足而且有埋龍蝦汁，香氣滿瀉。
不過隔離嗰啲一條條嘅綠色蔬菜裏就唔建議食，
因為好大浸草青味，唔係我嘅口味。
雖然套餐包左果汁、茶或咖啡，不過最尾都係揀咗茶。
普通綠茶個茶包級數唔差，至少唔係隨街有得買嗰啲Twining，
放左一陣好香但係唔會過分濃郁。
甜品拼盤都幾有驚喜，通常去西餐廳食嘅甜品都後求求奇奇一件芝士蛋糕，
依度有幾樣野，又有朱古力布朗尼、牛乳奶凍、提拉米蘇、桑莓醬棉花糖以及忌廉芝士。
樣樣都有板有眼，雖然迷你但係好不馬虎，
當中我最鍾意嘅就係牛乳奶凍，牛奶味好香但係唔會比甜味蓋過，
亦有超濃郁的芒果醬汁配搭、桑莓醬味道亦非常濃郁，
同鮮榨差唔多，雖然酸酸地但係真心健康呢！
＊西式午膳驚喜＊西餐大排檔
近日終於有空一嚐最近人氣急升的西餐大排檔，其食物質素確有驚喜。
午餐由128-168不等，免加一，收費公道。
只需加48元的海鮮拼盤，有蝦﹑鮑魚﹑生蠔﹑帶子等，食材十分新鮮，物有所值，海鮮迷不可錯過。
前菜是鰻魚薯仔沙律，有新意。惟餐湯則只屬一般水平。
主菜一 – 羊鞍，十分美味，不會太騷。 (推介度: 9/10)!!!
主菜二: 美國牛肉眼 (7成熟)，牛味濃郁，屬高質素的牛肉。
加上廚師功力足，七成剛剛好，不像一些西餐店般，
牛扒點了七成熟，上碟時卻是全熟。
餐後當然要來一些甜點，可惜奶茶非港式款式，不太喜歡。
泡芙則相當美味，友人不吃甜點，故我一口氣吃掉兩份泡芙。
環境悠閒，吃了兩個小時，店員亦沒有催促我們離開的意思，
還不停為我們添水，十分有禮，值得一讚。
吃了這麼多菜式，結帳一人亦不用200元正，
相對大型連鎖店如Oxxxxxx / Mx. Sxxxx，這間近日冒起當中的西式餐廳，
更讓我感到驚喜，值得再試。
＊串燒達人＊YAKI BIRU
呢排心癢癢，想食居酒屋。搵到原來大角咀都有間，咁岩我住旺角夠晒近啊！
帶埋兩個friend去食，去到都唔使點等位。
間野入面都幾靚架，好有古代懷舊日本既風格，有清酒有壁畫，
仲有個威士忌酒櫃，啱晒鍾意日本威士忌嘅朋友啊！
我地興致勃勃，叫左一大堆串燒食！
燒茄子：條茄子燒得好靚，有兩條，加左啲木魚沈喺上面，但略嫌有少少鹹啊。
日本番薯仔：細細粒、甜甜地都幾好食，份量仲幾多tim，夠哂我地幾個食。
燒秋葵：配埋日式麻醬好夾，第一次食燒左既秋葵，原來燒咗都好香口架，好特別，值得一試！
燒菠蘿：非常juicy又大舊又好甜，好開胃呀，岩哂用黎做前菜！
燒雞翼，好似有啲唔夠味，可以咸少少。
吉列廣島蠔，好肥美又多汁，炸粉好薄，蠔肉好鮮甜，仲有成6隻咁多，幾抵食！
澳洲羊架，呢個價錢食到燒羊架算係唔錯，肉同脂肪分布都OK，
幾肥美，羊味好重，燒得好入味，一咬好多羊汁。
仲好貼心咁用石紙包住個尾，唔洗整污糟隻手。
京都宇治抹茶紅豆蛋糕，呢個最有驚喜最好食，
個雪葩係由rosé 整成，應該係自家製既，好有心思，
有少少酒味，酸酸地都幾好食，
件蛋糕抹茶味好重好似仲有啲豆腐味，配埋個雪葩非常好食！
總括黎講，環境好舒服，串燒不錯，
而最好食係個甜品，大家去到不妨試下呀！
＊抵食到爆＊神戶屋
返工OT，放工就勁鬼肚餓，諗住同朋友拆餐勁既，我地專登落旺角兆萬揀間放題去拆。去到兆萬樓下已經有好多人派緊傳單，云云眾多放題餐廳入面，我地就揀左呢間。
第一眼望入餐廳，見到環境都算係唔錯，無論裝修定燈光都頗舒服，寧靜就算不上（因為好多人），但都適合一班人去一齊開開心心大拆。最重要既係，枱面空間唔逼狹，即使叫左好多野食都仲夠位，唔洗擔心就住就住嗌，食得唔暢快。
一坐低，我地就咩都想試下，好快就交哂單。值得欣賞既係，店員工作有效率，由交單起唔洗五分鐘已經開始上菜，醫肚無有怕。
最深刻就係呢個：牛肉壽喜燒火鍋
第一眼望落鍋到已經係鮮紅色既牛肉，而且用料十足、湯底濃郁，配合牛肉鮮甜，豐富既雜菇同蔬菜，一鍋就唔係好夠我地食啦。
熱食方面：
即使係放題餐廳，燒羊架一D都唔差，肉質唔會太堅韌，但羊既膻味略重。
炒蜆雖然唔係放題主角，但炒起來味道香濃，每個殼都有肉，沒有欺詐成份哈哈。炒雜菇菇味濃而炒粟米份量亦都唔多，淺嘗剛好。
飲品：
飲品種類都多，無論有氣無氣，果汁或茶都有得揀，唔洗驚淨係得汽水易有飽肚感覺。
炸物方面：
特別推薦一口芝士年糕，朱古力炸香蕉同埋迷你心太軟，呢類小食放題限定，亦唔係間間放題有，味道香濃，香而不油膩，值得一嘗。
刺身同壽司方面：
三文魚腩壽司有好香油香味，但係相對上三文魚壽司就略欠鮮味。
刺身方面，三文魚片算厚切，一片過放入口絕對係滿足既享受。
海老同唔同種類既海蝦都有，最緊要既係夠新鮮。
刺身上碟都算足料，叫完第一輪都用左唔少時間先拆得晒！
甜品方面就有多選擇：
個人特別喜歡3.6牛乳布甸，奶味重，口感極滑溜，必定滿足鍾情牛奶之人士。
訂閱：
文章 (Atom)