＊主攻生野的放題分享＊八幡屋

今日同我寶寶去兆萬既八幡屋，而我對放題⋯係好鐘意！因為可以食住刺身，又可以食下小食。諗到都爽。

一早已經book定枱，怕冇位好掃興a_a

黎到送左隻芝士波士頓龍蝦，龍蝦係升級就會送，出去叫隻龍蝦都幾十蚊啦，即刻翻晒本！

龍蝦啲芝士夠晒多完全唔使驚好Dry，仲要好有彈性，估唔到送嘅龍蝦都可以做到咁新鮮，完全唔馬虎！

咁岩又有個加幾十蚊升級，多D野食，裏面有啱心水所以就加錢啦。同埋見到隔離嗰啲人都有升級，自己唔升級都對唔住自己。

升級生蠔同埋蝦都唔錯，生蠔冇沙，好乾淨，都幾清新。蝦就好新鮮，完全爽口又清甜。

咁當然叫埋刺身係例牌啦，黎到個賣相又花又草，好多心思，不過我就梗係食左先講。

講最新鮮既，亦係我最驚訝既係希靈魚 ! 無錯係佢啊。直程可以媲美日本既味道 ! 

平時香港食到既偏酸，肉質實而不爽。今次食到係食到魚既鮮味 ， 肉質爽口。 刺身出油唔多，冇多餘水份，絕對新鮮。 

有頭蝦鮮都好正，夠甜！當然仲有好多刺身包括帶子，虎蝦以及三文魚，都係唔錯嘅選擇。

仲有好多壽司手卷依D野在乎你想用咩角度食野，師傅握力？新鮮？飯煮成點？但係用香港人既角度睇啦。飯醋適中，新鮮美味。海膽手卷啲飯有少少暖，快啲食就啱嫁啦。海膽質素唔可以話好高，不過絕對對得起放題嘅價錢。

左口魚壽司同埋火炙三文魚壽司細細件，一口一件，唔會太飽所以可以試多啲其他嘢。兩款都唔錯喎！有啲入口即溶嘅feel！

芝士年糕，牛油粟米通常留返最後先食，因為食咗會比較飽，芝士年糕叫咗幾次，裏面好有彈性而且味道夠香。牛油粟米雖然啲粟米好細粒，份量亦都細，勝在唔使食好多，唔會質飽你，唔夠先至再叫，牛油都好香。

最後甜品就食紅豆奶凍同埋櫻花水信玄餅，櫻花水信玄餅係最得意，好似一舊透明嘅啫喱，裏面有一朵花，粉紅色，只有小小嘅甜味，好健康。

咁既價位既放題我完全OK！