＊即叫即製·工廈特色火鍋！必試拉絲芝士丸＊火鍋仔

觀塘出名多工廈美食，天氣凍最啱同朋友一齊吹住水打邊爐；

今次我就順便預祝埋朋友生日<3

呢間火鍋仔地方寬敞易搵，前台有種日式居酒屋嘅感覺。

舖大但得廚師同店主兩個人，想像到多人既時候應該都幾辛苦。

我同朋友二話不說就叫左個$68嘅沙爹湯底，

個爐厲害到湯底幾下就滾，蓋住左都聞到濃郁嘅沙爹味。

醬料每位$18免加一，可以任意配搭，

份量口味自己決定，嗜辣之人表示佢啲辣椒仔未夠辣。

驚喜第一彈係$88嘅一碟芝士蝦丸，略貴不過自家制出面搵唔到！

蝦肉嫩滑，一啖咬落去，身為芝士迷嘅我就發現芝士流心熱辣辣有拉絲！

$148新鮮美國肥牛14塊，略厚身有份量，啱曬食肉獸，紋理分布得幾好。

$58秘制豬肉條，份量多抵食，豬肉真係好新鮮，不過秘製料味道不太出，味道無咩特別，見仁見智啦。

$32田園油麥菜，次次打邊爐都一定要有新鮮嘅油麥菜清吓口！

驚喜第二彈係$16出前一丁，碌完咁多野先擺麵落去，

個出前一丁掛湯得黎又有濃郁沙爹味，

調味料麻油乜都唔使落，真係估唔到即食麵都可以咁好味！

必試驚喜第三彈の即炸響鈴！

一上枱見到佢金黃鬆脆個樣就已經夠興奮，店主仲話啱啱炸起熱辣辣！

響鈴嘅精髓就係浸飽湯汁之後塞入口，金邊仲脆但係中間又軟又多汁，

一啖吞落去個響鈴就係個肚度膨脹嘅滿足感，真係食左四件度就飽曬。

兩個人飽到上心口都只係$494，一人$250有找，啱曬大食嘅朋友光臨。