＊香港兆萬放題＊神戶屋

呢家系香港既放題愈黎愈多，不論系日式放題定定燒肉放題等等，

都吸引唔少人注意，就連有d餐廳都會做埋甜品放題，

火鍋店又會做火鍋放題任食，放題系香港呢家都算系令人瘋狂既地步。

由於放題系我既食物字典入面都算系高消費既食物，

所以今次系揀呢間之前都諗過度過、聽到口碑好而且系旺角兆萬中心都幾方便就去左食

首先第一樣食既就當然系刺身，

聽人講放題食刺身系最容易反映到戈間放題既食，每樣都叫d是常識吧～

 有三文魚、甜蝦、鮑片、八爪魚，我最愛既三文魚好肥美，條紋都好靚，魷魚幾爽口

甜蝦大大隻吾厄秤。超級新鮮，頭入面嘅膏仲係湖水藍。

鮮甜到不得了。帶子都好爽甜，油甘魚同埋劍魚都好新鮮仲好肥美，啲魚油香到不得了

食完重頭戲，都試下其他小食熱食，都有好多選擇，

不過我就揀左軍艦、天婦羅，唔可以再食太飽，呢到就停手啦。

＊食雞嘅快餐店＊Chicken & Co ​

今日收工同朋友去長沙灣做運動，做運動前仲有少少時間去食個快飯，

所以揀左呢間食雞嘅快餐店。

我同朋友一人叫左一個chicken set，可以揀烤雞或脆雞，每款仲各有三隻味揀，一定揀到一款岩心水！

我就揀左蜜糖牛油味烤雞，件雞有成四分一隻雞，好大件！

我叫嗰時咁岩新鮮岀爐熱辣辣，蜜糖同雞翼好有BBQ嘅味道！

朋友就叫左檸檬百里香味脆雞，外皮香脆，雞肉嫩滑多汁，

唔會炸到乾曬，咬落去有淡淡嘅檸檬味，抵讚嘅係餐廳仲好貼心咁提供手套同濕紙巾。

每個餐仲跟兩個小食，我最推薦炸磨菇，原隻炸好脆好juicy，分量仲要好多有成6隻！

炸洋蔥圈都係大大塊，好脆又唔會炸到好乾好似柴咁。

粟米粒粒都好飽滿又甜，而沙津嘅煙三文魚同菜都好新鮮！

飲品方面，朋友就點左個花茶，有好清新嘅茉莉花香味，

但係我就覺得炸雞配汽水呢個組合真係無得輸！

​

＊一個價錢，有多種享受＊八幡屋涮涮鍋

同老媽子去食下飯

早排朋友介紹咗間幾好坐嘅放題，同得老媽子去，太逼嘅唔岩，無乜選擇又唔岩！ 

朋友話呢間都唔差，咁就一於會一會佢啦！

Book咗位，好快就可以入座喇，唔駛等！

間鋪都幾大，但見員工又唔算好多，心諗啲野咪有排等，點知原來間餐廳係apps去落單嘅，嘩！咁又幾方便喎！

野食方面又真係幾多選擇，間餐廳似啲任食牛嘅舖頭加日式放題嘅合體！即係可以打邊爐，又有得揀食刺身炸物串燒等等！總之都多選擇。

我同老媽子揀咗個海鮮塔，分別有兩層，海鮮種類如下圖：

跟住我地點咗3碟牛，啲牛味都真係唔錯！ 呢個價錢，抵啦！

我點咗劍魚腩同三文魚，媽子唔太食生野，就少少地啦，都算幾清新。

仲有刺身同炸物。

串燒就正正常常啦！ 最鐘意係燒菠蘿！ 佢加咗啲糖係表面，燒成焦糖後香脆嘅甜味加上菠蘿嘅酸，又真係幾好味喎。

野飲都係任飲，多到唔知點揀好，又有甜品！ 每人有一款食品贈送，我同媽子都揀咗雪條。

總結：一個價錢，有多種享受！不錯不錯。

＊平民中式晚餐之選＊東湖小廚聯威餐廳

同朋友係銅鑼灣睇完戲，已到晚飯時間了。經過渣甸街，見到東湖小廚聯威餐廳好似不錯，決定就係呢間食晚飯啦！餐廳位於1樓，空間感大，有兩人位，卡位，六至七人位，幾闊落坐得舒服。

餐單非常豐富，有中、西式飯，魚湯泡飯，精美小菜，粉麵類，扒餐等等。我同朋友好多都想試，苦惱左10分鐘後，點左兩個小菜：西檸煎軟雞、通菜炒鮮魷，仲有餐廳既皇牌黃袍叉燒飯。

西檸煎軟雞

炸雞吸收左西檸既酸味，非常開胃。而且，炸雞外皮唔會因為浸左西檸汁而軟曬，咬落去仲係脆口的，雞肉嫩滑又有肉汁，非常推薦比大家！

通菜炒鮮魷

一餐飯少不了青菜，炒得有火候，通菜同鮮魷好match，整碟都非常有鮮味。份量幾多，鐘意食青菜既你一定要試下啦！

黃袍叉燒飯

原來黃袍係指滑蛋，呢個飯一d都唔馬虎，叉燒厚切，肉質肥瘦適中，鮮甜美味！滑蛋亦嫩滑，如果多d醬汁拌飯會更好。

飲品方面，朋友點左紅豆涼粉冰，清涼解渴；而我就點左熱原粒柑桔水，酸咸味好出，好好飲。呢間餐廳總體來講非常滿意，下次一定會再去食。